【盘房来料】长方型横行区无限轮回
放咗接近一星期大假，港股就由三万边劲抽上㖊日慨31500水平，升足1500点，打破以往阿Man出门，港股例跌惯例，今次相反系劲升，反而返港后，㖊日就开始回调。隔晚美股终止八连升，港股似乎早有启示，㖊日略为高开即掉头，亦终止六连升，显著回吐逾300点，收报31152点，而国指则报收12440点，跌103点。今日港股低开137点，跌幅一度扩大至333点，低见30819点，几乎完全回补上周四所遗下慨上升裂口30809至31151点，至100日线30861点见支持，跌幅逐步收窄，半日恒指报收31116点，仅跌35点；国指则报13432点，跌8点。
美国10年期债息升穿3厘，华尔街缸边友又起戒心，隔晚美股亦回软，嚟紧走势如何，要睇吓中国代表团喺美国再进行贸易谈判有乜嘢消息，将会再次主导美股呢几日市况，皆因业绩期过后，又冇乜其他重要数据公布，大户要舞高弄低个市，都系靠消息。至于港股呢边，由29800水平反弹，至㖊日最高见31500点，反弹足足1700点，再一次接近大型长方型区间顶部，暂时整个大型横行区喺29500至32000点，月初当大市稍为跌穿29800即展开反弹，至昨日升至31500水平回调，可能呢一轮反弹浪又系咁上下。坊间唔少图表派认为大市已升穿下降三角形顶部，港股可以大翻身，但阿Man唔系咁睇，由二月见过29200水平至今，反弹一直未试过重上32000点之上，而对上两个月两次反弹至31600至31800水平已掉头，唔排除喺呢个区域已累积一大堆蟹货，而一般散户喺呢个区域之内无限轮回多次，资金多已被锁，一系就已无胆再入场，除非大户有心投入更多资金扫货，否则五月余下日子，仍有可能喺呢个区间内无限轮回。
重磅股方面，腾讯(00700)喺放榜前仍脚软，但今早见过390.6元低位后跌幅大大收窄，之前每次QQ公布业绩前跌，翌日股价必升，唔知今次会唔会又系翻版。至于其他重磅股表现平平，低位普遍有支持，尤其大笨象(00005)仍受惠回购持续及息口趋升，近日走势确系跑赢大市，暂时又上番78元水平。至于A股入摩被纳入指数慨建行(00939)及工行(01398)等四大行，由于H股现价高过A股，北水呢几日都系沽货为主，沽H买A系大户呢期做法，暂时四大行股价唔会好有睇头。
几时都话医药股要逢回吐吸纳，呢个板块确无令大家失望，板块内股份轮流破顶，今日较为吸睛系四环医药(00460)，众多医药股中，呢只算系药中之弱，今日大成交配合下急升一成似突破，估计完成圆底收集，升势未必咁短一，唯一担心系四环上面蟹货重重，沽压段段有，呢转即管睇睇有冇本事升上2.375元阻力区，现价追货用番今日开市价1.98元打靶，博唔博自己决定。
另一个阿Man今年至爱板块教育股，同样系段段有，个股轮住破顶创新高，无他慨，上面冇蟹货升得轻松，教育产业前景好，相关企业可保持高增长，当然值得睇高一线，跟医药股一样唔受贸易战影响，自然吸引资金流入当避险股。
麦狄文
(徐狄怡‧证监会持牌人)
