【轮证赢家】㖊日只腾讯熊…唉…
㖊日拣定只腾讯熊(59332)出嚟，谂住跟大队齐齐买企鹅业绩见光死啦，喺下半场1点50分左右，见腾讯(00700)5分钟图慨SlowSTC(14,3)出现超买，呢啲位仲唔系送只熊仔落场慨好时机，一旦落场心态上就只会出现两款：1. 见好即收，如是者你会喺下昼2点50分至3点5分呢段时间，腾讯(00700)5分钟图慨SlowSTC(14,3)由超买变超卖时收队走人，用(59332)5分钟图，以1点50分嗰日价0.42元作为买入价，再用3点正(59332)做出慨0.46元作为出货价，就咁计到一个钟头到已经有9.5%慨进账(大佬，你买10万执9500蚊架啦)，而呢个策略小妹㖊日下昼3点零喺微博上都同大家分享咗。
至于第2. 就系临收市前见腾讯5分钟图慨SlowSTC(14,3)出现第二次超买时入货，呢啲钟数摆到明就系坐过夜架啦。第一关就先要腾讯出到份业绩先，等到就嚟收工到咁滞腾讯先至出业绩，首季赚232.9亿元人民币，按年升61%，胜预期；唔紧要，成分业绩慢慢由头到尾睇一次，呢个时候友栏前辈杜比问我点睇腾讯收货吗，坦白讲睇上去又好似普普通通咁...只可以话无惊喜咁啰，杜比就话：好难估明日(即今日)巿场反应，暂时市场解读为胜预期，但逊高盛预期。至今朝早开市时腾讯裂口爆升，上返420蚊楼上水平，激死朕！以(59332)㖊日临收市前15分钟0.425元，同依家9点55分慨0.275元计，呢度已经输35.3%。妈，我下次唔敢啦！
咁揸腾讯put/熊慨系咪就无希望，要止蚀架啦？识得放手当重要啦，但识得几时放手先令到自己输慨幅度可以再减少啲就更架重要。依家10点正，喺公司突然有个印度女人行过，成班同事(包括我)都表示震惊，呢位印度女人喺旧Office时都系坐喺我哋附近，但好日都唔见佢返工，当我哋以为佢唔会搬过嚟慨时候，突然见到佢出现，好歹我哋都叫做搬咗Office成2.5个星期，佢今日先至第一日蒲头，由湾仔Office搬过嚟慨箱都仲未拆，巴闭！
同同事讨论完呢个印度女人之后再睇返个市，腾讯10点5分报412.6蚊，今朝高位424.2元就受阻于100天线(426.32元)，高开低收下就连条50天线(416.6元)都火速唔见；转保历加通道睇慨话，就会见到今日支实心阳烛成支穿咗上保历加通道顶，同时保历加通道口系无拓阔慨迹象，换言之，可以比多少少耐性去等腾讯会唔会再向下行多几步，到时再逃走都可以；但千祈唔好话沟货，谂住用正股沟货慨概念套落嚟轮证，因为轮证有杠杆，货多货重慨话其实可以令输到由999足金变9999千足纯金(真系可以输得好金)；再者，正股嚟讲按道理都应该沟上唔沟落，点解仲要去投资一啲下行慨股仔？(调整另计)
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；微博：Gladyshan
