【轮证赢家】冷吼两桶油开Put
Yo! I'm back! 收到大家慨email同微博留言问我星期一(5月21日)个检查搞成点，多谢大家关心，下星期一(28日)先至有报告，暂时都仲未知咩事，不过经过两日之后，今日只手已经唔驶再好似Barbie咁，伸直能力已经接近好返咁滞，总之就可以打到字啦(原来做完血管素描只手系会变咗杨过咁架...唉)；btw，今日返工见返战友Jack，多谢佢慨手信，可以咬住饼打稿。
继续跟进返上个星期五若然坐过夜而揸住慨腾讯熊(59332)先。星期一我喺屋企等够钟出门口时，见到恒指裂口上，而腾讯(00700)由9点开始做U盘时慨升8蚊，到正式开市升5.6蚊，到我做完检查再坐巴士返公司时又升少咗，至全日收市逆市跌，但(59332)仍然未返到家乡。到依家9点56分，恒指跌紧248点，做紧30986点；而腾讯就升5蚊，做紧413蚊，(59332)未打靶但账面仲输紧。日线图见腾讯条50天线(415.16元)似乎有啲阻力，而下方仲有一个上星期四(17日)形成慨上升裂口；不过转条保历加通道睇慨话，腾讯慨保历加通道口有拓阔慨现象，见下方技术标指都系向好，必要时(59332)都真系要我帮佢“安落死”。
又睇紧恒指日线图，10天线(31049点)一早升穿咗条100天线(30939点)，之但系今日条20天线(30661点)穿埋条50天线(30698点)，发出“黄金交叉”利好讯号，惜下方技术指标好似MACD同SlowSTC(14,3)都有打横慨情况，即反映大市暂未有明确方向，如是者呢个时候落注买大市升/跌，50/50赌大细慨味道甚浓。
大市方向未定就惟有向个股埋手。早排话地缘政治同中美贸易战紧张，推高国际油价系咁上；但依家中美贸易战似乎暂时告一段落，被推高慨油价升势亦有位唞一唞气，同国际油价关系密切慨中石化(00386)、中石油(00857)同中海油(00883)始见回调。呢三桶油最受油价直接影响慨其实系中海油，因为呢间公司几乎完全唔搞石油提炼工作，集中火力搞开采；但如果论走势图慨话，中石油上个星期五同今个星期一高位都系6.55元，“平顶”后今日随大市下行生咗支大阴烛出嚟，SlowSTC(14,3)亦喺超买范围下行中，中油Put(13961)，行使价5.78元，目前市场上最贴价Put；中海Put(13476)，行使价12.52元，两只都可以小注冷吼一吓。
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；微博#Gladyshan#
