【轮证赢家】恒指熊slowcook重街货牛证
㖊日由于时间关系，先喺朝早恒指由10点45分至11点15分呢半个钟头里面，见SlowSTC(14,3)都keep住喺超买范围，所以将只恒指熊(63999)送落场，按呢段时间(63999)慨高低位($0.083同$0.074)拉个中位数$0.0785，用呢个作为买入价的话，喺㖊日下昼2点40分，恒指跌39点慨同时(63999)则见$0.094，不消半日就将19.7%赚幅袋袋平安，又可以按住策略进行trading，唔好咩？但与此同时见腾讯(00700)㖊日都样样衰衰，所以见腾讯熊(59332)本来由之前狂输三四成，到㖊日计输一成六多啲，拉上补下仲有斩获，所以就止蚀咗就算啦。
㖊晚新闻话九巴司机今日会按章工作，但今朝新闻又话唔系好多司机参与，但今日坐巴士返工时都塞塞地，呢个咁无聊慨时候我仲谂住开吓app睇吓个市，老妈忽然send whatsapp我，佢话佢喺永安换咗把厨房刀返嚟，打算送比我(其实应该系我家老爷，因为我系“无饭”煮妇嚟架，晚晚都系我老爷操刀，我以洗碗换饭)，不过见到把刀，我只能回复我老妈一句：宝剑赠烈士？；老妈火速回应：不是烈士，儍瓜，烈士系已经死咗啦！是宝刀赠英雄！哦，好啦，总之我唔系个英雄啦。
返到公司时都过咗10点，依家恒指做紧30694点，跌65点，日线图上见到恒指筑起慨“下降通道”仍然健在，而今日恒指粒烛处于“下降通道”中间，唔使用低位计，单睇现价都跌穿咗条20同50天线(两条都系30701点)，再落慨话唔驶咁快去到250天线(28936点)咁悲慨，近近地“下降通道”底约30050点先啦。
㖊日数过恒指牛熊证街货，重货牛证就系30500至30599点，呢度有相当于1742张期指，而依家10点14分，恒指低位暂时喺30596点，即系话恒指曾经踩过入呢个范围里面，但好快又走返出嚟？“吓？咁重货都唔入去？有鬼呀？”我几肯定答你market惊穷多过惊鬼，但点解唔直接向下再冲呀同杀呀？坦白讲今年5月都真系唔系好“穷”，用依家10点20分恒指现价30650点计慨话，全个5月暂时都只系跌150点，会唔会系想牛证多啲街货之后，等6“绝”先至出手？难讲，总之用当下呢刻慨恒指牛熊证街货图睇熊证慨话，最贴价都要上到31100至31199点，但呢度同现价争成549点，而且仲得289张期指，吸引力实在太低。
恒指熊(64626)，收回价31088点，同现价有逾400点差距，杠杆约有43倍，适合day trade。
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；微博#Gladyshan#
