【轮证赢家】恒指未摆脱“下降通道”
上个星期五(5月25日)拣咗只恒指熊(64626)出嚟做day trade，有留意微博慨朋友应该都知道由于时间关系，只(64626)已经喺上星期五下昼3点松啲，按当日恒指喺朝早11点35分至下半场1点5分5分钟图SlowSTC(14,3)见超买，(64626)高低位($0.067同$0.061)拉个中间数$0.064作为买入价，同埋下昼3点3分(64626)做紧$0.082计，半日都执咗28.1%，虽则仲争几廿点先至杀晒30500至30599点慨牛证，但系学风云话斋“凡事太尽，缘分势必早尽”，所以早早闪人(呢句嘢应该系禅师所讲慨)。
㖊日喺屋企睇新闻，方东昇话已经连续唔知N咁多日气温录得33度以上，屋企楼下啲白兰花都晨早开晒，呢个夏天真系火辣辣，不过个市就真系冷清清，可能都系多得美国总统特朗普慨神经质，呢头话取消特金会，转嗰头又话希望见面，搞到今朝恒指先升171点开市，到我返到公司开埋电视之后，见到恒指倒跌3点，依家9点52分，恒指跌幅扩大跌41点，做紧30546点；it's fine，因为条“下降通道”仍然喺度。
开恒指牛熊证街货图睇，依家9点53分计，恒指最低做过30530点，即系话30500至30599点呢堆街货都系未死晒，咪以为见到条bar咁长就话今日个市食到好饱，记得恒指牛熊证街货图里面慨data系讲紧上一个交易日慨数嚟架，所以呢度其实已经所剩无几，要睇就睇30400至30499点，呢度有相当于698张期指，再落多100点就有938张期指。系未过千呀，不过如果个市继续以龟速下行慨话，你估会唔会吸引到资金博反弹，将牛证慨街加重先？
再睇埋上面堆熊仔，最贴价慨系30900至30999点，呢度有158张期指，同现价(用返头先mark底慨30546点计)比慨话，现价要弹升453点先到。唔系话要弹好多，400几点讲真系时个市火辣辣慨时候，两三下手势就弹得到上去啦；之但系下行咁近又有货，何必去咁远呢？恒指熊(64834)，收回价31000点，同现价有逾400点差距，呢个位已经高过“下降通道”顶部，所以有咩事要走都可以走到，唔会话一嘢就被打靶。按一贯策略吼恒指5分钟图见超买先好入。
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；微博#Gladyshan
