【轮证赢家】恒指熊等食近2000牛证街货
今日天气继续热爆，电视话天文台报今日有34度，喺屋企楼下等咗几分钟巴士都觉得就嚟会焗死咁滞，上到车一心谂住有冷机叹啦，都唔知系咪架巴士冷气坏咗，我企喺度都系咁流汗，反而落咗车之后啲风吹埋嚟仲舒服。
返到公司之后市系开咗架，依家10点14分，覆咗两个email之后再睇返恒指走势，似乎同今朝差唔多，依家做紧30671点，跌120点；至于㖊日只恒指熊(64834)，哼，先喺㖊日朝早10点半至11点半呢度可以“作案”慨时间，将恒指熊(64834)送落场慨话，再用呢段时间(64834)最高同最低($0.058同$0.043)计拉个中位数$0.0505作为买入价。揸住只熊仔直至到下昼，恒指似乎愈升愈有咁，中间一段时间恒指当然升幅有收窄过啦，就系喺11点35分至1点35分呢段时间，就连敏感度咁高慨SlowSTC(14,3)都只系由超买回返落去中轴水平，再落多少少见多啲“4”字头都唔得。
咁样落去得两条路拣，一系就输少当赢；一系就合埋眼继续揸落去，当㖊日喺微博篇文系发噏疯。如果拣前者慨话，按照㖊日下昼2点几(64834)证价$0.047计，即走就输三格兼手费；但如果选择当我发噏疯慨话，依家10点28分，用(64834)证价暂时最高见过$0.074计，即袋46.5%；就算用依家个证价$0.064计，都有26.7%。“咁㖊日走慨话咪好唔抵？”乜你未试过当你揸住一只/几只货时，啲货系跌慨；但当你放弃卖走之后，啲货升到无朋友咩？
依家10点38分，开恒指牛熊证街货图，下方牛证最贴价就系30500至30599点，呢度有相当于1125张期指，而按今朝恒指暂时最低做过30598点计，即系呢个位今朝个市只系好似啲女落温泉前咁，揾只脚趾公轻轻点到个水面之后就嗌“哗！好热呀！”，“但浸温泉真系好正架㖞~”系呀，我知呀，所以第一吓嗌基本上系废的，再加埋第二贴价慨牛证，即30400至30499点呢度有821张期指，望望月历今日29号期结，即系话5月应该做够数，唞一日之后为6月再重新做过，呢两part咁近又有接近2000张期指慨街货，不如等尾市时揾只有约500至600点差距慨熊证，小注一博明日开餐食牛证街货啦。
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；微博#Gladyshan
