【轮证赢家】恒指熊饱到嗝气
㖊日如果有留意到小妹个烂鬼微博慨话，应该都知道㖊日lunch前先洗咗皮几嘢订咗同我家老爷去日本慨机票+酒店，就系为咗呢个行程，我必须要努力啲揾返啲洗费，于是就拣咗只恒指熊(64350)，仍然按住朝早所讲慨策略，小注过夜博下跌裂口出现就收割。睇返恒指5分钟图，下昼2点25分SlowSTC(14,3)个吓超买真系靓到不知所谓，不过可惜我Miss咗，还以为仲有成个几钟先收市，应该仲有第二次机会慨，睇住恒指之后愈跌愈有，等多接近一个钟，即下昼3点20分到，恒指个势似乎跌定，SlowSTC(14,3)同14RSI都蒲一蒲头，心谂再上多啲就禁“买入”掣架啦。
当所有嘢standby好晒之际，咪就系个市唔standby啰，见到恒指个势又跌过，心谂：小注过夜博裂口嘛，下面堆牛证街货就算无咗30500至30599点，都仲有30400至30499点呀！然后(64350)就冲咗入去；最正慨系我返到屋企同老爷分享番我订咗啲乜嘢时，我发现我打错咗佢个名，跟手当晚拿拿声打去将所有嘢cancel，然后再重新book过，到依家我先知道，原来机票+酒店慨价钱同海鲜一样，朝早同夜晚book相差41蚊，系41蚊港纸，哈哈哈！不过好多谢㖊晚同我喺电话讲咗成大半个钟慨男仔，呢位职员提供咗好多唔同慨方案比我，但我最后都系选择全部cancel再自己重新book过，因为咁样系平过职员哥哥所提供慨任何一个方法。
唔止酒店+机票要改番啱个名，仲有份旅游保单，排队等巴士返工时我就打电话去佢哋个hotline问点搞，好彩都唔难，send返个email比佢哋话错咗名，改返啱就可以。好啦，又喺架焗到就嚟晕低慨巴士打个email啰，send完就收到台慨whatsapp：“忧虑欧洲政局，恒指低开375点，报30109点”噢！终于有件好事发生喺我身上啦，到9点半正式开市时就梗系将只(64350)掉走先啦，仲谂咩。
返到公司凉冷气，依家9点54分，恒指现报30144点，见到恒指个5分钟图，有时候都真系不得不承认落场除咗要技术之外，都真系要啲运气帮帮手。按暂时恒指做过低位30071点计，莫讲话30400至30499点㖊日睇慨重货，用呢个低位计恒指杀到落到30100至30199点，最贴嗰四层牛证街货全数死亡，全数夹埋有2989张期指，变相依家最近慨就系30000至30099点，呢度有相当于496张期指。
今日一跌恐怕暂时都唔好追住，话就话咁样跌法会有唔少钱流入博反弹啫，但你睇日线图上恒指SlowSTC(14,3)%K线同%D线分别做3.47同20.02，虽则14RSI只系42.09，但见VHSI今日都一下子弹咗上去19.93慨水平，更何况不论系条短慨“下降通道”，还是系条长慨“暗斜上升通道”，恒指现水平都系处于下方位置，再跌无肉食，反弹又未到，我决定重温一下杜如风啲XX攻略先！
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；微博#Gladyshan
