【轮证赢家】牛证街货重6月真系穷?
㖊日话个市担心意大利有事，一嚟就裂口低开，前日临收市先买慨恒指熊(64350)就系咁就走人，之后个市虽然有再插多啲，仲穿过30000点添，但到下半场见个市好似等4点收工咁，所以下半场我都无乜点睇到个市，至收市见到个点数都好似同我食完饭返嚟咁上下，谂到谂到系闷局。
今朝早起身睇电视就话意大利个边无事啦，呢啲政局/政治问题其实好似男女朋友咁，嬲你一晚就算啦，第二日又糖黐豆，你见今朝恒指又弹返上去就知啦。如果从技术层面去解释慨话，咪就系㖊日所讲恒指现水平处于短慨“下降通道”同条长慨“暗斜上升通道”两条“通道”慨底之上，触到底通常都有力弹一弹慨；麻烦就麻烦在于下方啲技术指标势头仍然向下，SlowSTC(14,3)咁鬼感敏都未屈返向上就知啦，即系反映市仍然偏淡为主， 依家10点29分，或者恒指暂见高开低收就系咁慨原因。
睇睇恒指牛熊证街货图依家咩境况先。上方熊证见㖊日个市跌得就跌，咁就梗系走得慨走啦。最贴价熊证街货就系30600至30699点，呢度有522张期指，全数都系㖊日新增慨街货，用依家10点31分恒指现价30222点计，如果现价反弹477点先可以食得到呢堆街货。
至于下方慨牛证街货，最贴价就系29900至29999点，呢度有576张期指，同样用返现价计，只要个市下行多322点就可以杀晒呢度啲牛证。但最吸睛慨系29700至29799点，因为呢度有1538张期指，哗！原来咁多人喺呢度博反弹架！不过要杀到落呢度就要恒指由现价跌522点先得。
系就系远咗啲，但真系多货㖞；兼且6月系穷架嘛...不过我都系度度先！
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；微博#Gladyshan#
