【轮证赢家】继续采顺势策略
㖊晚踏到正一正就拎手袋走人，事关约好咗个师傅上嚟度尺做蚊网；师傅走咗之后有只飞蚁走咗入嚟，有少少抓狂之余都知道听日(即系今日)势必风起云涌。果然今朝早呢场雨确系好大，坐地铁转shuttle返工慨话，等嗰架shuttle就有排等；坐巴士返工慨话又话绕道有意外，二选一就梗系拣坐巴士啦，就算等/塞，我都系坐喺架巴士里面塞，而唔系企喺街度等shuttle嘛！9点出门口，平时半个钟慨车程，今日变咗个几钟，系呀，依家10点16分啦。
㖊日拣咗只恒指Call(19410)出嚟，如果按一贯策略慨话，基本上朝早10点25分同埋下昼3点15分，恒指5分钟图上慨SlowSTC(14,3)出现超卖，呢两个位亦系入(19410)慨好时机。按照(19410)喺呢两段时间慨，分别约$0.081至$0.082同$0.088至$0.089计算，今朝恒指裂口高开126点，报31219点，过多15分钟恒指5分钟图慨SlowSTC(14,3)两条踩入超买范围，呢个时候就应该将(19410)送走，按呢段时间(19410)做$0.097至$0.1呢个范围计，至少都有八格落袋。
依家10点28分，睇返恒指日线图，依家恒指粒烛就完完全全企咗上100天线(30987点)；换条保历加通道出嚟睇，恒指现处于保历加通上升通道中间，顶部(31551点)配上恒指牛熊证街货图慨话，如果恒指有一日系慢升上到呢个位置慨话，即系会踩到入31500至31599点， 由依家最贴价慨31300至31399点(按暂时最高做过31303点计)慨熊证起向上计到31500至31599点，呢三个100点慨熊证街货夹埋有相当于1079张期指。而重头戏就系喺31600至31699点，“过千张？”唔系，843张啫；但如果过多两日再多啲钱流入博掉头慨话，呢个位过千张都唔奇。
至于下方慨牛证都新增咗唔少贴价慨新证，依家最贴价慨就系30700至30799点，呢度有相当于179期指，而最重货反而系29900至29999点，呢度就真系有过千张啦，“企咁远做乜？杠杆好细咋㖞！”咁可能呢啲就系由30000点边皮博弹升，揸住只当时慨贴价牛证到依家呢！如是者个市升咗过千点慨话，呢堆牛证杠杆再低，都已经帮佢哋慨主人账面揾唔少。
继续采顺势策略，恒指Call(29110)，行使价31600点，属轻微价外轮，且于同一行使价中杠杆最高慨一只(约14倍)，都系嗰句：虽然个市慨升势唔算好雄好强，但友栏杜比金句：要敬畏市场呀！
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；Weibo：#Gladyshan#
