【盘房来料】阿根廷获救纾困IMF仲可救多几个?
隔晚美股个别发展，道指跟标指喺石油股支撑下仍有升幅，但纳指喺连创续三日创新高后回吐，但港股隔晚亦见回吐，ADR跟夜期均已回落至31500点之下。新兴市场危机又升温，今次轮到巴西揩大镬，货币雷亚尔兑美元逼近4算警戒线，股市应声急挫逾6%。之前阿Man都讲过，对于新兴市场货币持续贬值，不能掉以轻心，皆因除雷亚尔之外，包括印度卢比、土耳其里拉、阿根廷披索、墨西哥披索、印尼盾等新兴市场货币今年已经大幅贬值。阿根廷面对货币崩溃，刚刚成功向IMF度水500亿美元，系IMF有史以嚟批出最大笔常备贷款，为期36个月，暂时免过一场危机。不过新兴市场多国货币相继大幅贬值，IMF今次救得阿根廷，下次仲救得边个，阿Man真系无眼睇。
近日美股升势，跟港股反弹势头强劲，市场仿佛对所有潜在负面因素冇件事，但缸边友视若无睹，唔代表呢啲问题唔存在，money never sleep，资金流向反映市场风险胃纳，某程度上可切实地反映呢啲负面因素，对市场影响已逐步浮现。即使港股连日上升，恒指累计升幅达千七点，㖊日阿Man已提醒大家，31500水平已接近移动区间顶部，再高追唔单止无乜肉食，更分分钟接半棒成大户点心。虽然熊证重货区仍有一重注结集喺31600至31700点水平，但大户未必一定赶尽杀绝，已解释过系发行商喺高价派发相关产品，既已派晒出街，基本上唔需要再维持秩序，回收与否已唔重要。
睇番今日港股一开波经已下跌77点，开市价31435点已经系半日高位，仲要低开低走，整个上午直插无水花，最多跌417点，低见31094点，半日报收31126点，跌386点。国指则报收12241点，报166点。好友唯一仍可自我安慰系半日成交连500亿唔够，叫做沽压唔算太严重。不过今日呢一跌，恒指㖊日见完高位后，已急急脚回补31200慨上升裂口，咁快回补最近一个上升裂口，唔排除呢个反弹浪已完成，又系时候向下行。反而呢三个月大市都系移动区间上落，29800点至31800点两千点内行，㖊日反弹至31500水平又掉头，即系级级向下行，落番30000边唔出奇。
大市插得急，全要系腾讯(00700)昨日反弹至432元又遇阻力回落，讲过425元颈线唔企稳两三日，唔算真突破，今日半场喺无事无干之下插水2.7%，盘中更曾低见415.4元，半日报收417.6元。话咗腾讯连日反弹遗下几个上升裂口唔系好事，加上反弹成交一直未配合，阿Man一早判咗佢跟大市一样，有波幅而冇升幅，一日唔企稳颈线以上，兼且突破埋435元，都唔见得有运行。当然仍有腾讯铁粉继续大睇好，阿Man就比较保守，股王已难回复去年王者强势，今年唔可以再买咗扑晕自己坐货，要识得睇位炒上落。
继医药股同教育股成为提款机后，今日轮到燃气股被提款，龙头中国燃气(00384)被魔笛追魂，大摩降其评级，股价半日跌逾7%，其他燃气股普遍跌2%或以上。累积升幅大慨强势股，睇嚟半年结要抖气，反而可留意具世界杯概念慨波鞋股，龙头安踏体育(02020)跟李宁(02331)，股价今日见回吐，只要守住10日及20日线之上，升势有余未尽，可趁调整吸纳。
麦狄文
(徐狄怡‧证监会持牌人)
