【轮证赢家】今次只系技术性反弹？
㖊日lunch走咗过去隔离镇(九龙湾过牛头角啫)，同友栏杜比同埋成日帮我执稿慨阿强一齐食，对住一个前辈同埋一个90后暖男，呢一个钟慨lunch我觉得我同公主都无乜分别。多谢杜比餐饭！
都差唔多食完慨时候，恒指忽然反弹400点，于是拿拿声埋单走人(做online/做新闻系咁架啦)，碌到返公司睇返个市，好似弹完嗰一下就等收工咁，于是都系无做任何行动；就算今日见恒指日线图，都系叫做“身怀六甲”，只系个样无咁靓仔啫，不过SlowSTC(14,3)%K线准备喺低位升穿%D线架啦，比多少少耐性啦。
依家9点47分，恒指做紧29711点，升15点，最惊吓慨应该唔系舜宇光学(02382)曾跌8%，而系身处泰国慨老爸whatsapp send张泰国慨街景相去family gp chat，然后留底五个字：出发去跳伞。做囡慨就只能够讲句：加油，小心玩！系慨，跳伞好过瘾但有一定慨危险性；同个市一样，上上落落好过瘾，但分分钟随时输死人。
开恒指牛熊证街货图先，依家9点53分，恒指升多咗少少，依家报紧29700点，升74点。今日睇恒指牛熊证期指张数比例约63：37，牛多过熊即系大家都博反弹。睇图啦，下方最贴价慨牛证系29300至29399点，呢度有相当于1588张期指，如果现价开始向下行多470点慨话，就可以完全食到呢层街货。至于上方慨熊证，最贴价慨系30900至30999点，呢度有688张期指，如果要食得晒呢度啲货慨话，就要个市向上行1229点先得。
从图表上睇慨话，大市确系有反弹慨迹象；之但系从街货图上嚟讲，反弹确系无意思亦无肉食。到底今次会唔会只系喺牛熊分界线前作技术性反弹，然后弹完就散？认真，谂唔通，愈谂愈肚饿，落街买早餐先。
上个星期父亲节啦，原来谂住去钻石山度探吓阿公慨(母亲慨父亲都可以庆祝吓啫)，谁不知舅父Eric要去澳洲出trip，今晚先返，结果就决定明日先同阿公补返个父亲节。Well，佢老人家应该唔介意慨，咁我估大家都唔介意【轮证赢家】听日休息一日慨。
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；Weibo：#Gladyshan
