【盘房来料】大户等消息发围锯牛扒
道指连升四个交易日，纳指又再创收市新高，港股受累内地股市疲弱，呢个星期开局未升过，今日卒之见A股有得弹，港股再弱都可以弹番一下。不过呢一下反弹力度确系强差人意，10日线(28417点)仍未能收复，市底摆明系弱过药煲。
恒指今早高开170点，早段曾升204点，高见28386点，惟未能收复10天(28417点)，之后跟随内地股市收窄升至42点，低见28224点。恒指中午报28268点，升87点；国企指数报10649点，升57点。咁慨反弹力度都算失礼，好大原因系无成交配合，今日半日成交400亿都唔够，证券行啲乌蝇拍大派用场。
经过五穷六绝之后，唔少缸边友都期待七翻生，仲以为世界杯完咗，由缸边友变身赌波专家慨炒鬼会回归，奈何天气不似预期，呢个星期暂时大市成交额仲要再缩水。阿Man就识得有职业炒家，世界杯期间为咗睇波搞到出现时差，到依家仲未较番啱个作息时间，睇嚟港股七翻身已无望，至少喺成交薄弱之下，大市难成气候。
最大镬系港股自上月跌穿250日线(约29477点)之后，一直未能收复，目前喺多条移动平均线之下，而最底慨10日线，呢两日更成为反弹阻力，咁慨走势之下，缸边友有乜辧法唔死心。至于大户亦未见发动攻势，当然暂时系淡友占上风，只系呢两日又唔见再有利淡消息，淡友想再发围亦冇借口。不过市底偏淡不容置疑，偏偏睇番牛熊证街货，散户似乎仲抱有一丝希望，睇睇呢两日牛证街货数目有增无减，而27600至27900点之间慨牛证街货已相等于超过3500张期指，再加埋27900至28100嗰超过1500张期指，大户踩低大市诱因比起推上去更大。
重磅蓝筹股普遍反弹，港交所(00388)跟沪深交易所讲掂数，对方愿意尽快研究将同股不同权公司纳入“港股通”，港交所都算做倒嘢，股价半日升0.6%。呢个消息当然对小米(01810)最有利，股价半日回升5%，更创下22.2元上市新高。不过阿Man条颈硬过乜，话之你小米已成贵米，股价上到招股价上限，一句讲晒唔会食贵米，但市场静到咁款，缸边友见小米个场热闹，当然集中火力贵米照落镬。
科技股个别发展，当中有辣有唔辣，小米当然最有人气，其次系㖊日畀沽空机构狙击慨舜宇(02382)，集团例牌反驳指控，加上今次沽空机构未有出报告，只系喺社交网站帖文，说服力当然唔够几十页纸慨沽空报告嚟得有效，睇样都系纯粹博懵。舜宇股价反弹5%，可惜半日仅升1.5%，反映无人肯高追之余，仲趁反弹沽货。另一市场焦点中兴通讯(00763)急升两日后回吐好正常，阿Man认为反弹都应见好就收，明知公司嚟紧两年业绩都要食白果，唔通仲同佢做人世，短炒hit and run，有食梗系要即食。
麦狄文
(徐狄怡‧证监会持牌人)
