【盘房来料】逛书展扫书好过入鱼缸扫货输
隔晚美股企定定，道指跟标指再升，但纳指创咗几日新高都要抖抖气，隔晚微跌1点收市。本以为Google母企Alphabet被欧盟违法垄断法重罚超过亿欧元，但股价竟然未有大插，可见美股市底有几强。至于港股呢，呢几日都系高开低走，完全跟唔上美股慨升势，正正反映港股市底有几弱。阿Man曾表示港股跟美股相关系数开始减低，对A股走势却愈来愈敏感，即使坊间有人认为美股作为全球股市龙头大佬，港股无论如何都要二仔底死跟。
不过近年港股开始唔多跟美股走，反而一直被A股牵绊住，近日内地股市受贸易战及人民币贬值两大负面因素拖累下跌，而港股亦只跟A股插，不跟美股弹。香港多日都系高开低走，走要级级落贴住地板行落地窂，估计二万八呢个心理关口唔顶得几耐。27800点前低位失守，当然直指27600点牛证街货重货区，再杀唔杀深啲落到二万七，阿Man都系得个估字。
人家美股慨科技股仍保持强势，纳指屡创新高，但港股呢边慨科技股则甩甩漏漏，单系睇只龙头腾讯(00700)几咁弱，已知科技股喺港股呢边已失宠。美国科技股日日创新高，亚马逊大老板已荣登全球首富宝座，但近来无论系科网股，手机股，半导体股喺港股呢边，全部无运行，只有死猫弹同大插两种走势，阿Man都无眼睇。
其他重磅股个别发展，早两日热炒慨内需食品股今手下跌，濠赌股则反弹，摆到明市场系塘水滚塘鱼，钱得一注炒，沽一瓣买一瓣，缸水情况未有改善。新华保险(01336)发盈喜，半日股价升6%，其他内险股把握机会冲喜一下，内险股普遍上升。不过内银股继续唔精神，寻底之旅尚有一段路程，睇嚟之前个低位唔系乜嘢支持，三两下笃得穿。小米(01810)行使超额配股权，涉资约55.58亿元，完成埋呢个任务，暂时无乜必要再托高股价，反正已一尝到达招股价定价上限22元慨滋味，睇嚟小米可能喺19元至22元之间上落。
小米几时可镬纳内港股通系靠估，而平安好医生(01833)跟碧桂园服务(06098)亦够晒资格，难怪成为港股通新贵热门，不过两股㖊日急炒之后，今日即见回吐，幸而阿Man向来唔主张冲动高追。其实呢啲市况，又岂能冲动高追，未有买入上升股份，顶多系失去赚钱机会，但冲动买错股，下场当然系输钱，目前呢啲市况少做少错，怕忍唔住手扫货，索性熄机唔睇，一年一度书展盛事已开幕，开卷有益，不如逛书展买书，好过乱入市场输!
P.S. 面对如此沉闷慨股市，阿Man又忍唔住要放假出外走走，明日《盘房来料》暂停一日。
麦狄文
(徐狄怡‧证监会持牌人)
