【盘房来料】留意恒指能否守住28200
美股强势不可挡，坚系穿顶莫估顶，纳指跟标指齐创收市新高，道指跟高位亦仅一步之距，几时见顶无人知，总之喺全球资金集中流去美股之际，美股仍能一枝独秀，跑赢环球股市。美股㖊晚咁好表现，多得美国跟墨西哥达成贸易协议，再加埋枫叶国有话有得倾，对本来已兴奋慨市场情绪再带嚟刺激。虽然中美贸易谈判毫无进展，但有关2000亿美元商品加征关税，美方将咨询期延至九月初，无论最终呢一笔咁大数额慨货品会否加征关税，中国都被认定系输家。但估计点都会对中港股市，甚至美股带嚟震荡。
承接隔晚美股强势，港股隔晚继续挟淡仓，指数更升越28400水平，挑战28500点。今早恒指顺势高开259点，收复50日线(28341点)，开市后曾升308点，见28580点逾两周高位，不过8月9日高位28700水平连影都未见已回头，其后升幅收窄至21点，曾低见28293点半日低位。恒指中午报28340点，升68点；国企指数报11076点，升27点。港股反弹结束与否，呢两日要睇住28200-28300呢个位，上周27600守住再上，同样道理，呢个星期28200点守得稳，反弹仲有机会继续，相反指数失守28200，甚或连28050亦跌穿，是次反弹完成，之前裂口已回补，今次再向下的话，又系另一跌浪慨开始。
重磅蓝筹股今日已唔似㖊日咁一面倒向上，中资金融股今日见回吐，四大内银股业绩前个别发展，中行(03988)跟农行(01288)升0.5%，建行(00939)跟工行(01398)则高开低走，上半场倒跌，收市仲系呢位，日线图枝阴烛都几样衰。腾讯(00700)果然向上挑战365元，不过更大阻力喺375元，企得稳365元先算，唔排除反弹已近尾声。今日较为出系港交所(00388)，有大行唱好，半日升近2.5%，不过阿Man唔建议高追，讲真今年港股成交愈玩愈缩，多咗重磅股上市，未见成交额有进账，港股缺水情况可见一班。
再睇埋港汇㖊日又再烛及7.85弱方兑换保证，金管局又再出手接货，明日本港银行体系结余将降至841.8亿元，目前港汇仍然喺7.85附近徘徊，唔排除金管局随时又要出手。港汇疲弱反映资金继续流走，港股缺水情况暂难扭转，挟淡仓只不过系一时，睇嚟个市都系继续一浪低于一浪慨格局。
上星期阿Man话担心物管股或成为下个被提款对象，今日就见物管股跑输，虽然物管股受整体经济环境影响较少，系熊市中攻守兼备慨选择，但早前炒到有啲过火，估值唔平之下，有获利回吐捱沽好正常。至于医药股情况一样，虽然业绩交足功课，前景亦被睇好，又有大行上调目标价，但现水平估值唔平，有心买货睇长线，畀多些少耐性等靓位上车。
话咗人行出招救人民币，短线对人仔系有刺激，但长线人民币贬值趋势冇变，对人民币升跌较敏感慨内房股，阿Man已讲过，博反弹见好要收。今日内房股普遍回软，睇嚟内房股反弹可能又结束，仍有货喺手要考虑一下分手呢个问题。
麦狄文
(徐狄怡‧证监会持牌人)
