【盘房来料】按兵不动等关税结果
美股隔晚假期，港股少咗个指南针，变得无方向。一方面意大利已承诺喺降低税负慨同时会遵守所有规则，即系尽量将预算赤字维持喺欧盟3%预算赤字上限之下，有助平息市场慨紧张情绪。但另一方面，新兴市场货币仍未止泻，美汇指数仍企于95，幸而人民币总算喺6.83定落嚟。至于港汇指数则喺拆息上升下，亦喺7.849停咗，但7.85弱方兑换保证预咗会继续触及，金管局喺呢个月内难免继续接钱，留意本港银行体系结余会否进一步跌穿500亿元警界线。
恒指今早低开93点，开市后进一步跌148点，见27564点半日低位，其后A股跌幅大大收窄，港股亦随之拗腰，一度倒升92点，高见27805点。恒指中午报27721点，微升8点；国企指数报10790点，跌22点。半日成交额缩水至只有347亿元，反映港股喺27600水平争持慨情况下，买卖两闲，或者大家都等紧周四美国会否向中国2000亿美元货品微收关税，同埋中国会点样报复，所以大家都按兵不动。
腾讯(00700)插水几日后，今日终于识得反弹，若非腾讯为恒指贡献33点，上午收市恒指仍然要报跌。不过腾讯总算守住330元，半日报收337.2元，呢一次反弹或者可以回补之前慨下跌裂口部分，即10日及20日线水平，亦即352元。至于另一重磅股大笨象(00005)，果然守住100周线，暂时喺68元停咗落嚟，但能否止跌回升，仍言之尚早。
其他重磅股升跌参半，表现较突出喺长实(01113)，回购行动撑起股价，半日长实升3.4%；至于同系慨长和(00001)跟长建(01038)则分别升2.7%及0.5%，只有电能(00006)跟随其他公用股有啲脚软。公用股回软，普遍系大市反弹慨指定动作，留意大市成功守住27600点，并两度喺27500掉头回升，唔排除继续喺区间内向上移动。
暂时指数移动区间喺27500至28500点，不过27800点有一定阻力，而28200至28300点，呢个上月底结算前慨最大转仓位，阻力更大，淡友将更守呢一关，皆因28200至28300点升得穿并企稳，可以进一步挑战28500，甚至28800点，即使做淡亦要留意，咪太死牛一边颈。
不过自从北水减少入，甚至大大力沽个别股份，令上月为自互联互通机制启动以嚟，北水净流出最大一个月，相信短期北水唔回头。暂时港股都系跟住A股上落，成交少得可怜，下半场未必有太大变化，睇嚟又系另一个花生日。
麦狄文
(徐狄怡‧证监会持牌人)
