【轮证赢家】小注买熊博盒八星伴月
今朝一早就返到公司，不过到依家10点23分，啱啱先搞掂套push system，一阵仲要试，所以就拿拿声趁段时间睇吓个市(重点系交稿)！
㖊日就执咗只恒指Put(26085)出嚟，喺朝早9点50分、下昼1点40分同2点20分，都见到恒指5分钟图SlowSTC(14,3)出现超买，第一个时间9点50分唔计啦，唔好话份稿，连睇市都未睇真，用之后嗰两个时间作为买入时间啦。喺下午1点40分时(26085)高低位做紧($0.134/$0.133)，平均数就系$0.1335，而2点20分就见到轮价报$0.13，再将呢两个数拉个平均数呢，就系$0.13175，呢个就当作为买入价啦(粒数根本就唔会咁复杂)。
“使乜咁复杂，今朝早恒指都见红啦，(26085)收网啦！”都系慨，不过计吓个赚幅令自己开心吓啫。恒指今朝低开184点，开市报27789点；依家10点40分，恒指跌幅扩大至跌298点，做紧27676点。拆开恒指5分钟图睇，见恒指由今朝9点55分至10点25分，呢段时间慨SlowSTC(14,3)两线都返个位数，呢个时候就系(26082)收网慨靓位，呢段时间(26085)高低位($0.144/$0.140)慨平均数$0.142计，赚幅有8%，够买一盒散装迷你冰皮慨。
有无计由一盒散装迷你冰皮变成一盒八星伴月先？开恒指牛熊证街货图睇吓个故事慨下集啰。依家10点53分(个system好番啦，可以专心啲啦)，恒指做紧27612点，跌361点，最低暂时见过27582点，呢个位呢讲呢，其实即系踩咗入最贴价慨牛证范围(27500至27599点)，而呢度有相于891期指，再向下望见到牛证第二至第五层每层街货都有400几至600几张期指喺度；至于上方熊证又唔系话无货慨，最贴价慨27900至27999点得201张期指，要比多100点，即28000至28099点呢度先有618张期指，咁秤就梗系下行杀牛着数啦，反正再睇返日线图见恒指仍受制于10天线(27869点)之下，下方技术指标继续发出看淡讯号。恒指熊(59878)，收回价28288点，同一收回价中杠杆最高，小注博博八星伴月返嚟先！
作者阿珊，从事财经及投资版报道超过10年，由平面媒体走到网络世界，《钟摆战略赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；Weibo：#Gladyshan#
