【轮证赢家】恒指沿下降道通下行
㖊日拣慨恒指Put(27137)如果喺朝早10点20分时见到恒指跌幅收窄嗰下，5分钟图上SlowSTC(14,3)升至70附近水平时落场慨话，喺下昼2点几时(27137)做过0.166附近水平，(27137)都执到10格8格，够买多两盒月饼啦；不过喺<下半part>时有讲过恒指Put/熊好喺㖊日收手啦，事关见到个市都踩住咗条保历加通道底，保历加通道未见有拓阔现象，估计个市有会系出现一个调整/小型反弹，务求将粒烛屈返入保历加通道里面先。
今朝喺屋企食紧麦皮时，睇电视见日经跌逾200，心里面只魔鬼就谂：唔系挂？放走晒啲Pur/熊仔你同我讲仲跌？但两秒唔够天使就是咗出嚟话：嗱！唔得咁样架！赚咗钱落咗袋就系落咗袋，有早知就无乞儿，有钱赚唔好咁样怨呀，心态唔好呀。当然，最后梗系碗麦皮战胜一切啦，人系会肚饿的。
返到公司见到个电视顶出咗条横签：恒指低开78点...都无理得咁多，走去pantry斟完杯水之后返嚟覆埋一堆email，依家10点33分，见到恒指已经由跌转升，做紧27006点，升31点，再睇返个图，原来一度倒升过220点。就用呢个点数计数，恒指牛熊证街货图上见下方牛证最贴价慨系26800至26899点，呢度有相当于688张期指，同现价比就相差206点；至于上方熊证，最贴价就系27900至27999点，呢度有相于400张期指，同现价比慨话就争993点，似乎都系下行近啲㖞。
如果画返条“中期下降通道”出嚟慨话，其实恒指由此前8月底慨高位28579点至28533点呢度，掂到“中期下降通道”之后，至今就回落，形态上就是弹珠咁撞返到接近个“中期下降通道”底先停，而依家睇日线图上见就仲未掂到个“中期下降通道”底，恒指熊(61015)，收回价27948点，成交活跃又安全，但考虑到今晚中美贸易战第二波有不稳定因素出现，做到day trade就day trade啦，做唔到就唔好入市啦！
作者阿珊，从事财经及投资版报道超过10年，由平面媒体走到网络世界，《钟摆战略赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；Weibo：#Gladyshan#
