【轮证赢家】高位发吽逗？
有时都真系明白大台慨剧就算个剧本有几正都好，都坚系会被人围插。话说小妹㖊日又继续睇套新剧，见到里面重演“青姐落泪”嗰一幕都真系令人回味(点解落泪？因为汇控(00005)被人质到落33元(调整后价格应该系30.333元)；不过，戏里面话公司股价由前日收市慨86元跌到落到得20.2元，之后有买盘托返个价上去，由20.2元上返40元(咁上下啦)，但系大台就影住个报价机喺呢段时间就用绿色向上箭咀，大佬呀，20.2元上返40元呢啲叫“跌幅收窄”，唔系“升”呀，“升”系讲紧同前收市价(即系86元)比较呀。我相信唔止我一个人留意到，但当我同战友Jack开心share时，佢回我一句：“有认真过吗？”
我都系睇返啲“正常”慨报价好过，恒指今朝话中美有望重启谈判，所以就一个大裂口升453点，开市报26798点，依家5点59分，恒指升跌扩大至551点，做紧26896点。其实呢几日都keep住有提过恒指日线图上SlowSTC(14,3)落到一个超卖到无可能再超卖慨水平，所以就算要做任何trade，都要以快打慢，尽量day trade；今日一个大裂口，将恒指由贴住拓阔中慨保历加通道底，一弹就弹返上保历加下降通金中间水平，恒指牛熊证街货图上又弹离牛证，按牛熊两边最贴价慨26200至26299点，同埋27200至27299点，用返头牛mark低个现价(26896点)计，上行差403点，而下行就争696点。
日线上见恒指同SlowSTC(14,3)，不过今日一弹就弹咗咁多，若然恒指要再爬上去食熊证最贴价慨街货的话，最低限度都要弹返上条10天线(27098点)先得，咁又唔使上到20天线(27507点)咁多慨，呢啲嘢再睇未来走势啦。
如果拆开恒指5分钟图睇慨话，今日裂口高开已经将分钟图上慨技术指标都抢高晒，依家有高位回落慨迹象，想博埋听日升多浸慨话，就要吼恒指5分钟图出现超卖先可以啦。画多四条线，“短期下降通道”今日突破咗，但仲未走得出“中期下降通道”慨魔爪，继续行以快打慢慨策略，市弹完之后唔多郁就由得佢唔郁唔落场就算，事关今日大市靠消息弹，弹起到依家10点21分都未见方向，好似系高位发吽逗咁，就即管等佢发完先，下昼再睇。
作者阿珊，从事财经及投资版报道超过10年，由平面媒体走到网络世界，《钟摆战略赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；Weibo：#Gladyshan#
