【轮证赢家】恒指牛收工等过中秋
㖊日拣咗两只牛证，分别系进取恒指牛(66205)同稳健恒指牛(66126)，按恒指5分钟图，㖊日下昼1点55分时见到SlowSTC(14,3)超买计，(66205)高低证价($0.052/$0.048)中间数$0.05；(66126)高低证价($0.078/$0.075)中间数$0.0765。但㖊日见到个市升完之后又脚仔软，始终都系惊惊地，喺《下半part》都讲咗如果尾市守得返条20天线楼上慨话，咁技术上都叫做升返上保历加上升通道，两只牛证都仲可以守得下。结果㖊日收市报27477点，收高于㖊日条20天线(㖊日数：27411点)，如是者(66205)同(66126)可以返入牛棚度休息，翌日再战。
今朝恒指开报27712点，即系话㖊日target 27600至27699点嗰过千张期指重货今日全数死亡，如果今朝早一开市见到恒指裂口飙咁多而走(66205)同(66126)慨话，睇返当时(9点35分)证价最高位分别系$0.08同$0.106，赚幅分别有60%同38.6%；依家10点8分，两只牛证证价回咗少少，各自做紧$0.064同$0.091，咁都有20%同18.9%慨赚幅，应该都够买多盒月饼下个星期过中秋啦。
依家10点10分，恒指走势继续由高位回落，依家做紧26700点，而今朝开市时其实恒指已经踩入27700至27799点，呢度有746张期指，由呢度开始向上数多三层，即28000至28099点呢度就有1166张期指驻守，可能大家都觉得个市对住28000点呢啲齐头关口阻力会比较大，所以驻重货喺度啦。同现价比，如果大市由依家无啦啦向上弹升400点慨话，就可以杀到入呢层慨门口，而沿途就打爆晒27700至27799点、27800至27899点，同埋27900至27999点慨街货，三层夹埋有2067张期指，威力拍得住粒山竹。
至于下方牛证最贴价慨系27000至27099点，呢度有相当于692张期指，同现价就差600点，留意返，呢600点慨差距其实沿途一啲嘢食都无，而牛证重货就落到去26600至26699点，呢度先有1109张期指驻守。
再睇埋恒指日线图，㖊日都讲过条“中期下降通道”已经升穿咗，而下方技术指标仍发出向好讯号，反正(66205)同(66126)都已经落袋，今日又星期五，想追多转慨可以再吼牛证/Call轮，想等收工返屋企同屋企人食饭慨，就叠埋心水上网睇吓有咩月饼买返屋企好过。
作者阿珊，从事财经及投资版报道超过10年，由平面媒体走到网络世界，《钟摆战略赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；Weibo：#Gladyshan#
