【轮证赢家】方向唔多清晰休战过中秋
今朝搭搭吓巴士时，出面无啦啦落雨，就落车先知原来同同事Josephine同一架车，两条友一落车就跑上桥，好彩落车时又细雨返。
上个星期五(9月21日)恒指飙到唔识停咁，一朝早恒指牛(66205)同(66126)有你无你食咗先(我知下半场升得仲劲，但有餬就食啦，系咪)；但如果喺下朝见个市气势未弱时，打算再追多只恒指牛博杀28000至28099点重货慨话，先系喺上个星期五慨下半场，拆恒指5分钟图，系见唔到有一个超卖慨水平可以比你入只牛/Call，当中SlowSTC(14,3)喺下昼1点50至55分时最低都只系见“6”字头，呢一个绝对唔系超卖水平，根本连中轴都未落返去。
其次系由点零两点呢一下开始至收市，SlowSTC(14,3)都Keep住超买。如是者，假设你下昼想入市但根本就无位比你入；若然朝早或再前一日你已经有牛/Call在手，成个下昼对你嚟讲根本就系放牛收Call慨时间。更要再入牛/Call亦非我哋一慨贯慨策略。
至今朝见恒指裂口低百几点开市，依家9点56，恒指跌幅进一步扩大至跌373点，做紧27580点，50天线(27811点)失守，依家下望慨话就讲紧系20天线(27391点)，换言之，今日一跌都尚算叫做喺条保历加上升通道里面；不过，如果画返之前嗰条“中期下降通道”慨话，依家恒指又处于呢条通道慨顶㖞...
至于恒指牛熊证街货图又点？下方牛证最贴价慨系27200至27299点，呢度有相当于650张期指，同现价(用返头先mark底慨27580点计，两者相差380点；至于上方慨熊证，最贴价慨系27900至27999点，呢度有相当于209张期指，同现价比相差419点。
照咁计就更系下行近又多啦，之但系头先讲到28000至28099点嗰堆过千张期指重货仍然系度，仲只系熊证第二梯队街货咋㖞，如果个市比多少少力慨话，只要一个蜈蚣弹就可以杀得晒呢批街货。不过依家又系就到期结慨日子， 之前个市CHOK到癫咁杀咗咁多街货，唔知会唔会趁个市又企系中牌位，等两边储定多啲货先再做嘢呢？方向唔系话无，只系唔多清晰，今日休战。
唔知大家今日有无得放早，但相信返写字楼慨早一两个钟点都有慨，小妹在此祝各位中秋快乐！人月两团圆！星期三(26日)再战！
作者阿珊，从事财经及投资版报道超过10年，由平面媒体走到网络世界，《钟摆战略赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；Weibo：#Gladyshan#
