【盘房来料】港股风后无人入场干跌
上周港股本来弹得好地地，奈何“侵侵”又玩嘢，坚持数未倾掂税先抽，讲到明有关中国2000亿美元进口商品关税一定照收，呢个消息一出，上周五晚港股喺夜期跟ADR时段即插水，今日开市跌势更因风灾过后加剧。唔少缸边友闹爆指今日唔少人难以如常返工，又有人因为风灾停电停水，㖊日要救家园而疲于奔命，仲边有心情入场炒股，劫后余生又确系无乜心情炒股。
实情外面交通状况仍未恢复正常，至少巴士服务仲未搞掂，地铁东铁线又无左一大截，咁慨情况仲要返工，只有乱上加乱，仲会阻碍清理进度。不过香港呢个国际金融中心，停市一日咁大损失，话之你返工要花上大半日，总之市照开，股照炒，大户一样要做世界。阿Man想讲慨系，今日咁慨成交额，大户要做世界分外容易，成交少少舞高弄低不费吹灰之力，呢个情况醒目缸边友当然靠边站。暂时大市喺26800点有支持，反弹完结与否能以作实，今日风后影响成交特别奀，加上唔少缸边友都等埋2000亿美元关税公布，建议呢一刻按兵不动，无谓入场做大户点心。
恒指低开256点报27029，开市后曾高见27037点后，二万七关失守，10日线(约26970点)亦相继失守。喺内地股市拖累下，港股跌幅曾扩大至跌523点，低见26763。恒指中午报26856，挫429点；国企指数报10423点，挫151点。半日成交额得368亿元，全日成交额可能又唔够800亿元。咁慨成交额，系咪值得用人命去换取。唔少市民都认为今日香港应酌情停工停市，明白喺天气状况唔再恶劣下，政府好难作出决定，但私人机构顾主系可以弹性处理，而港交所亦有宣布停市慨决定权，点解唔考虑一下普罗大众困难之处，系要打工仔揾命博都要返工开市!!!!
全城交通瘫痪，今朝一早玩残全港打工仔。其实政府带头作表率，非紧急部门既公务员停工一天，并鼓励私人公司效法，以减轻公共运输压力。咁慨情况特事特办，于大型天灾后可视乎情况后宣布全港放假。但系政府只系墨守成规，总之唔挂八号风球就要返工，冇情讲。睇见新闻有人因为上班途中被大树压倒昏迷，只能叹句人命何价!! 值得一赞系逼东铁返工慨市民，喺大围站过千人候车逼爆站慨情况下，仍能秩序井然，实在不可多得。另一方面要闹爆坐地起价慨的士司机，由新界东出湾仔竟开天杀价收取过千元车资，叫一个打工仔情何以堪。
讲咗咁多唔关大市慨嘢，系因为阿Man实在不吐不快，唔少行家中环之友，今日盘房冷冷清清，有啲行家话好多同事返唔到公司，但因为开市关系，总得有人喺公司坐阵。再见到今日半日慨成交，似系冇成交下干跌，又畀机会大户做世界。
最睇唔过眼系蓝筹股几乎全线仆直，但长实集团(01113)竟然逆市升0.5%，成为最佳表现成份股，呢吓先叫人最唔忿气。大佬呀，㖊日睇住个公仔箱，眼见好多爆晒玻璃慨大厦，无论商厦定系住宅，出事率最多正正系超人出品，今日股价仲要逆市升，都咪话唔吹涨!!!
麦狄文
(徐狄怡‧证监会持牌人)
