【轮证赢家】方向未明唔落注
放完一日假返嚟，好似所有嘢都重新洗牌嚟过(可能系无货过夜挂)。依家9点47分，恒指做紧27761点，升161点，日线图上恒指仍然于保历加上升通道；换条天线睇，上周四(9月20日)升穿过50天线后，到依家都仲未爬得返上去；但留意返，10天线(27266点)向上兜紧，就嚟升穿20天线(27352点)，亦即系话好大机会就有一个久违了慨“黄金交叉”出现。
不过，老老实实，10同20天线生出嚟慨“黄金交叉”，威力点都大唔过50同250天线生出嚟慨“终极黄金交叉”，BTW，你见SlowSTC(14,3)，%K线(84.594)同%D线(81.482)两线就嚟上到“9”字头，即系话严重超买慨时候又到；再加埋条“下降通道”就见上星期四升到上“下降通道”顶之后，就开始慢慢落返去，会唔会系遇顶回落，个市又趁10月金融海啸真真正正10周年，杀人一个措手不及？
望埋恒指牛熊证街货图，依家10点6分，恒指做紧27681点，升182点。上方熊证最重货就系28000至28099点，呢度有相当于1561张期指，同现价比就相差418点，若再加埋最贴价慨熊证嗰427张期指的话，全部就可以食到1988张期指。
至于下方牛证喺27200至27299点都有1060张期指架，而同现价比都只系争481点，咁样计点数上的确系比上行慨多，且期指张数又比上行慨少，之但系两者相差63点同928张期指，望望月历今日9月26日，听日就期结，依家10点20分恒指点数反而无乜大变动，会唔会个新市依家选择坐定定喺度嚟等货入，到储够佢心目中想要慨货啦，过埋期结再一次过大啖大啖咁咬落去呢？
个市想点行暂时都仲未有明确方向，喺呢啲时候落注，Well，你知我唔会架，因为同赌大细系无乜分别，今日上昼就抖多半日，睇埋下昼个市想点再算啦。
作者阿珊，从事财经及投资版报道超过10年，由平面媒体走到网络世界，《钟摆战略赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；Weibo：#Gladyshan
