【轮证赢家】好友“背水一战”?
上个星期五(12月1日)被班developers(多过一个，所以要加"s")毒我download只新game，又约实边日几点攻边个城，又话点样围剿又点样储粮，唉，weekend攻咗两次都系输慨，第二次仲要“围上围”，打到个城都飞走，搞到都无乜心机打；今日返嚟见到其中一个developer Cyrus(一个所以无"s")佢系条team慨副团长，我话佢：“搞错呀副团长，打亲都输慨”我见佢拎住部电话打紧，对住个芒叹咗口气“唉！技不如人！”算啦，陪你哋班友打多两日啦。
不过，今日一众好友似乎向淡友进行复仇，话说个市都由11月22日高位30199点开向下行到今日暂时(截至10点9分)慨低位28803点，呢度都有成4.6%跌幅架；就算上个星期推熊证出嚟目标价先set喺20天线，转个头都已经达标。再睇今日恒指，本来一开市继续下行，穿埋29000点呢个位，谁不知同战友Jack吹完两句水之后，就拗腰向上升返，你估得啱，因为腾讯今朝开市穿过380蚊之后，依家(10点17分)弹返上去388.4蚊嘛。
好友今次复仇成功？还是淡友继续挥兵南下？只要摊开恒指牛熊证街货图就可以知架啦。依家10点18分，恒指报29141点，下方牛证29000至29099点嗰916张期指好明显今朝一开市就阵亡，变相依家最贴价慨就系28900至28999点，呢度有相当于1328张期指，再向下数慨话，即系喺28800至28899点同埋28700至28799点，呢度都分别有1256同1340张期指，呢度夹埋有成3942张期指，同现价比较慨话，只要淡友队步兵向南行441点，就可杀到呢3000几千张期指。
咁好友呢？最贴价慨熊证系29700至29799点，呢度有546张期指，望上去唔数点数，暂时无一个范证范围有过千张期指，无肉食又行得远，除非个市突然之后爆升，令恒指现价点数“迁城”迁到近偏熊证慨位置啦，否则又远又无肉食慨地方，打完都无乜期指可以食到，浪费兵力。
如果系咁慨话，今日恒指拗腰有就机会系“吸引近牛入场博反弹慨假象”令到班好友谂住“一鼓作气”嚟个“背水一战”；事实又成唔成功呢？虽则日线图慨SlowSTC(14,3)率先踏入超卖范围，但系%K线同%D线分别21.62同33.99，讲过SlowSTC(14,3)属于比较短期同敏度度偏高慨技术指标，按目前%K线同%D线呢组数值嚟讲，其实真系可以超卖再超卖；而其他技标指标目前只系由此前慨超买回落中轴水平，如果淡友发动“万箭齐发”慨话，嗰3000几张期指确然系冻过水。既然系咁，亲爱的主公，恒指熊(68609)，收回价29750点，同现价有逾619点差距，以恒指5分钟见超买视为落场点，50天线(28685点)或保历加通道底部(28637点)为攻城目标。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
