【轮证赢家】仲有熊证重货喺度架
㖊日恒指开场无耐就穿咗条10天线，计埋牛证重货区有成逾6000张期指咁吸引之下，有读者email比我话㖊日喺文章一口气推咗三个冧把出嚟系近期少见，真系心水清架啫；唔理你系进取型慨恒指熊(63705)、稳健型慨恒指熊(69278)，定系死懒鬼慨恒指熊(61485)，依家9点55分恒指跌逾400点，20天线(29285点)都穿咗，星期二(11月28日)定落嚟慨目标“恒指熊先望20天线”都已经达标啰，咁呢三只熊仔咩位都食得啦 。
睇返恒指日线图，今朝早一开市先低开332点，开市报29291点，呢个大裂口下挫之下，到搭正9点半之后正常大市会再向下行多一两步，到技术指标严重超卖到无可能再超卖之后，个市先至会出现跌定慨情况。拆恒指5分钟图就见到今日暂时低位系9点50分做出，见过29158点；依家10点15分，恒指跌幅…你可以叫做收窄咗啲慨，但都仲讲紧跌逾300点啰，就算你公司好似我公司咁坏剩得一部升降机而你要排队排10分钟先可以逼到入去，再施施然斟埋杯水先开个电脑同证券户口慨话，其实都仲有时间比你慢慢嚟。
“依家再追熊会唔会太迟呀？”开恒指牛熊证街货睇吓点先再答你啦。依家10点21分，恒指最低位仍然系今朝9点50分做过慨29158点，用呢点嚟度落去牛熊街货慨话，即系恒指最深曾经踩到入29100至21999点，拆细啲，即系踩咗入29150至29199点呢个50点慨范围里面，呢度有相当于1653张期指，换言之一个朝早大市就食咗4737张期指，㖊日期指结算日就完啦，今日11月30日即系12月期指慨第一日，哼，咁快就食咗4000几张期指，班芬佬仲唔系谂住12月返半个月就算咩。(坊间有部分发行商网站提供慨恒指牛熊证街货可以拆细到以50点为一个范围慨单位的)
再数落去，变相依家最贴价慨就系29100至29149点，呢度有相当于684张期指，再向下数(用返我哋平时计开100点嚟计数啦)，喺29000至29099点呢度其实都有2241张期指架，呢个位附近日线图上就无乜线喺度慨，但胜在29000点系呢点数整数大位嘛，系无㖊日或前日买定熊证今日食呢吓咁劲慨，所以要追慨话就小注追落，恒指熊(68484)，收回价29900点，逾37倍杠杆于市场上属偏高水平(车太贴始终唔好)，吼分钟图见超买可视为入市位。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
