【轮证赢家】恒指熊先望20天线
㖊日山长水又远咁返番去学校，同一班细过我起码10年慨后生仔女倾吓依家传媒慨生态，坦白讲我又唔系啲咩老行尊，只系毕业后就糊里糊涂咁做到依家；寄语想入行慨后生仔女一句：做传媒饿你唔死但唔好指意发达。
睇返个市，恒指喺上个星期三(11月22日)做过高位30199点之后就行人止步，到今早依家10点5分，恒指最低做过29484点，失守10天线(29500点)。走势上恒指虽然筑起一条小型慨“下降通道”，不过大市由年头发到年尾，呢条长期慨“上升通道”仍然健在，大方向无变慨情况下出现下跌，就系传说中慨回调，至于调几多就无人知亦唔敢讲，事关今日已经系11月28日，下个月12月你同我都放假慨同时，你估班芬佬唔会早早收炉收工咩？如是者大市将会以闷局慨方式，闷到出年再算。“乜唔系年底会做粉饰橱窗慨工作慨咩？基金收炉但都要交数架？”如果大家台底个target慨催到大市过30000点慨话，其实高位都已经做过30199点啦㖞，达标啦；正如做sales跑数慨一样，老细set个target比你今年做10万数咁先算啦，你会做到合格多少少慨11万数，还是爆数爆到离行离列慨50万数？“梗系做爆条数啦，Commission都多啲啦！”若然你真系咁谂慨话，都几肯定你唔系做sales，因为做sales慨人会话：“做11万就算啦，如果你做到50万慨话，容乜易你个target由今年慨10万暴升到出年慨60万，甚至70万呀！”
开个恒指牛熊证街货图睇吓啦个市系咪真系要继续向下啦。依家10点19分，恒指报29612点，跌73点，睇牛证区慨话，最长嗰三条bar(即系最重货)慨就系最贴价个三个范围，分别系29200至29299点、29100至29199点同29000至29099点，呢度分别有1420、2198同1664张期指，夹埋都有成5282张期指，反映到大家都希望个市回调完再上呀，用现价计慨话，若然要食尽呢三part超级重货慨话，大市就要由依家向下行多612点先得。
睇埋上方慨熊证，最贴价慨熊证就系31000至30199点，呢度有45张期指；再上多100点，即30200至30299点，呢度有相当于996张期指，对比下方慨牛证嚟讲，期指张数确实系少好多，好明显就系之前大市回调时将熊证收割慨结果，唔紧要，数就照计架啫，同番同一个数去计慨话，即大市由依家向上行多687点就食到呢两堆货(合共1041张期指)。
照咁睇，大市现水平慨位置同牛熊证最贴价慨区域根本一啲都唔近，讲紧都要500、600点先到城门；但用期指数张作为吸引度嚟讲，好明显一下方牛证系吸引过上方架啦；真系要放一个悠长慨圣假期慨话，相信食埋呢5000几张期指就放得比较安心。恒指熊(61485)，收回价30250点，同现价有逾600点距离，用住条20天线(29188点)做住目标先；你大注慨，够食就收队啦。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
