【轮证赢家】腾讯业绩如何恒指走势也应如何
㖊日同个旧同事Jarvis食lunch，几多年无见？大家都数唔出啦，只系知道佢刚刚quit咗份“妈剧亭”慨工。上个星期佢忽然揾我问吓阅文(00772)；㖊日lunch倾计都有问吓个市，讲真我又唔系啲咩专家，问我把鬼咩，我都只系将当下个市况讲比佢知咁解，佢话依家个市好难睇，我话：咁可以玩个股慨(反正我㖊日都系咁讲)。
如果玩个股，都真系可能有人会追只友邦(01299)，被几间大行唱好之余又无情白事被大户钦点咗接平保(02318)力，推高恒指慨升市股神，但可惜呀，咁推法啲技术指标都出现超买，今日就更加随市下行。无计，依家个市慨节奏快到阿妈都唔认得，鬼叫依家资讯同科技都咁发达咩。
睇返今日，焦点就梗系只企鹅腾讯(00700)派业绩啦，不过未派成绩表之前，今日恒指失守29000点关口，腾讯日线图都踩返落去条10天线(381.8元)附近，事就无咩慨，因为腾讯由上个星期二(11月7日)至今筑咗个“长方形”出嚟，顶就上星期三(8日)高位398.6元，底就系上星期二低位380.2元，即系话腾讯有咩事挞Q慨话都仲有条10天线同“长方形”底托住，穿唔穿就睇佢份业绩慨做化啦。
又睇返个市，今朝喺屋企咬住件莎莉蛋糕时，电视右下角show紧日经粒数系红色慨，然后个Anchor小姐就话：“港股ADR普遍下挫…”哼，真系“莎莉…多谢你”，如是者就预咗今日恒指都系无乜运行。依家10点27分，拆恒指5分钟图见到一个大裂口出现，都唔系重点，重点系喺10点10分见到恒指失守29000点，暂时低位见过28944点。
即刻load个恒指牛熊证街货图睇啦，恒指本来喺熊证最贴价慨范围架嘛，今日转身射个三分波就射咗去牛证最贴价28900至28999点嗰边，呢度有相当于452张期指慨货，而牛证重货区就系28500至28599点呢度，有相当于1750张期指，又真系除非腾讯出嚟个业绩搞到成地眼镜碎啦，否则唔似会一下子再跌多400几、500点啰，事关落到去牛证重货区慨话，技术上恒指要跌穿条20天线(28621点)先得。
上方熊证又如何？依家10点35分，恒指做紧28998点，跌153点，系有跌定慨迹象慨，因为分钟图都见到恒指跌到落去暂时低位28944点之后，技术指标都已经无位再比佢跌。如果个市29000点失而复得慨话会唔会好啲？本身29000点呢个系大关口慨数，系会着紧少少慨，但若然呢个位失而复得又得而复失再失而复得咁样来来回回慨话，意义就不大啦。
虽然恒指之后慨走势(讲到依家10点40分为止)都真系跌定兼上返29000点楼上(几快又失而复得)，但日线图见到除咗啲技术指标系发出向淡慨讯号之外，佢自己本身条“上升轨”今日都断缆啦，就姑且等腾讯份业绩啦；恒指同腾讯=两生花，无人反对架嘛，系咪？
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
