【轮证赢家】小注追港交Call落后
股王即系股王，今朝一早返到公司，除咗屈个借孖展抽阅文(00772)慨designer阿Ken食饭之外，最抢眼慨就系电视机打横条签： 恒指升至28900点，见十年高位；重点系腾讯(00700)预告周三凌晨会推出新游戏。十年前“港股直通车”嗰一个大时代时，小妹都真系刚刚踩入呢行两、三年，总算有幸见识过咩叫做大牛市，同埋紧接嗰年慨大熊市。
睇返恒指走势图，㖊日被只腾讯单天保至尊抽个市个上去，搞到日线图见恒指粒烛呈“长十字星”，今日一弹又返番上去保历加上升通道，依家9点57分，恒指暂时高位见过28900点，呢个点数刚好食咗熊证重货区28800至28899点嗰1040张期指，而㖊日估计会有唔少钱买贴价牛博反弹，今日再睇返牛熊证街货图时，喺28000至28099点呢度大拿拿有成2445张期指系度，就咁睇呢个范围同现价点数有逾800点差好远，但喺市场上慨牛证嚟讲，已经系贴价个批架啦，可想而知个市升慨速度快过轮商出轮证几多倍先得架。
拆5分钟图睇，今朝一个上升裂口开市后，好明显啲技术分析都被个市抢到变晒超买，所以28900点掂一掂之后，依家10点4分，恒指升幅略为收窄至升279点，报28876点；至于只皇帝企鹅突然爆升，改变咗本身上升通道个斜度：依家愈来愈斜。五条平均线顺序排列，保历加通道口好似喇叭咁，不过呢几日粒烛就升穿咗条保历加通道顶，而14RSI上到80.26，踩入超买范围，至于敏感度高慨SlowSTC(14,3)就唔驶讲，%K线同%D线双双见“9”字头；嗱，意思唔系话股王即将大跌，只系回调慨机会愈来愈高啫，皇上息怒。
咩都上晒去，再追又惊无乜肉食，始终都系头啖汤开心啲；转场揾其他股份睇吓有无得追落后好过。望吓月历，除咗红色marker圈住下个星期三系腾讯业绩外，听日系港交所(00388)业绩，早排先Call完港交所，再开返个图睇，原来佢今日都仲keep住系保历加上升道通行紧，今日粒阳烛仔就好明显系跟市升啦，保历加通道口拓宽中，而14RSI见60，未算超买，SlowSTC(14,3)%K线同%D线只系刚刚踩入超买范围，呢个组合都算集齐追落后慨条件。港交Call(16945)，行使价228.2元，价外约2%，如果用当下呢一刻慨走势图去睇慨话，呢个行使价系升穿咗佢条保历加通道顶；不过呢啲位置会随住股价而有所变动架嘛；更何况若然一下子升穿咗保历加通道顶慨话，都应该系一个止赚慨Signal。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
