【盘房来料】港股仍然锁range内玩震仓
美股上周五三大指数创收市新高，以为今日港股乘势再做好，谁知传嚟沙特内战兼打贪，中东佬资金要走人，吓到港股今朝再度考验50日线。恒指略为高开见28616点半日高位后即掉头，五分钟内急插300点，连失10日(28383)及20日线(28435)，喺50日线(28103)前刹掣，跌幅大大收窄，至中午收市报28436点，跌166点；国指则报收11472点，跌130点。留意半日成交已达643亿元，咁一落一上，似乎有资金趁震仓时入场。
讲嚟讲去个市仍然喺个range里面无离开过，仲系28100至28600上落，一个好消息或者一个坏消息，就喺个range里面chok三五百点，无论好友淡友依家都十分忐忑，上又好似无力上，落又落唔到，都系睇番个股稳阵。
腾讯(00700)几时都系有买贵，冇买错，即使今朝个市玩急回震仓，腾讯股价见一见364.6元，好快已企番住365元上面行，半日收市再创370.6元历史新高，只要腾讯唔死得，个市唔升都难大跌。况且接住阅文(00772)上市又轮到腾讯持有慨易鑫(02858)招股，带住腾讯呢个光环，预期易鑫呢只4S汽车股招股同样火热，不过易鑫冻资能力一定无阅文咁厉害，新股一浪接一浪，估计腾讯喺下周三派成绩表前，股价易升难跌。
至于其他重磅股多数脚软，阿Man睇好港交所(00388)业绩前有得落镬，谁知炒㶶咗，半日又失222元，盘中更低见218.4元。港交所今日试咗两条移动平均线后反弹，要回复升势，定必要升破225元，否则都系运吉。至于其他重磅股，今早跟随个市低位回升，讲真走势唔算太差，尤其三桶油喺油价做好之下逆升，当然又系中海油(00883)最强。
留意北京燃气蓝天
其实石油股回勇，燃气股正路亦会有追捧，阿Man见北京燃气蓝天(06828)上周五出咗通告，大股东北京燃气向其注资，体现大股东对其支持。留意注资收购项目代价以0.5元发新股，跟现价0.53元只有些少折让，即系现价系一个相对安全慨购入价，问题系北燃蓝天肯唔肯落镬炒上。睇番基本因素，随着未来更多收购同注资项目落实，未来业绩只会愈嚟愈好，而今年已完成多项收购，今年业绩肯定胜旧年。再睇埋北燃蓝天目前慨股东阵容，除咗大股东北燃蓝天之外，仲有邓普顿新兴市场基金，海通国际私募基金、中国东方资产、中州国际及中国华融国际等等，前景一定有番咁上下，否则又点会吸引咁多大孖沙入场。
麦狄文
(徐狄怡‧证监会持牌人)
