【轮证赢家】Chok市宜采即日鲜及窝轮为主
呢期恒指chok到头都晕，牛熊证分分钟被个市chok断颈都未知咩事，明明晨早粒烛仲系条10天线楼上，收市时升转跌，拣定出嚟慨恒指Call(21423)从恒指5分钟图上见系朝早11点同临完上半场前都出现超卖，Call轮落场本来就唔怕会被打靶慨，但同样都系怕市况唔就都系死路一条。以头先嗰两个靓位入市时间计，(21423)轮价约0.245至0.25元，收市报0.241元，账面暂输1.6%至3.6%。
今日其实10点未到就返到公司开晒所有机，不过就系部私伙mac机死都要我update，搞咗大半个钟都仲update紧，“咁点解唔用公司部电脑顶住先呀！”哼，有边个会谂到做online慨地方部电脑系唔support streaming，我都唔想！开得返部机讲紧都10点29分，恒指今朝个裂口都补完，(21423)最高只系做过0.242，咪玩啦，咁样得一口价我都好难做架，好在小注唔重货，Call轮嚟讲都仲有啲本事去揸多阵慨(重点系㖊晚我老妈慨生日饭系我家老爷好豪气地碌卡，请晒成台人食饭，包括我，嘻嘻)。
帮隔离sport同事揾完啲财产界人事帮手写世杯稿之后，都已10点50分，开恒指牛熊证街货图睇，mark底依家恒指报32642点，日线图上处于10天线(32785点)以下水平，暂时最低做过32321点，即系话牛证区嚟讲，大市今朝下挫将牛证杀到落到32300至32399点，呢个范围内相当于558张期指，本来属第四贴价区，咁依家就好明显升咗做最贴价牛证区啦，此前个三个100范围慨牛证total就有287张期指，对于大户嚟讲的确只系一个早餐。
重新望多次牛证区，承上所指恒指最低做过32321点，换言之32300至32399点呢度其实都只系得21点去顶住，而里面嗰558张期指都预咗绝大部分已经死亡；第二贴价范围变成32200至32299点，呢度有相当于1092张期指，再落多100点，即32100至32199点都有成717张期指架。
至于上方熊证，最贴价慨系33000至33099点，呢度有相当于150张期指，但现价要由开始上行358点先可以踩入呢个范围。依家10点59分，恒指又倒升返58点，做紧day high，呢358点会唔会今日突然爬到上到真系无人知，只知道慨系一个咁chok慨市，策略上买轮同以day trade为主就最稳阵，我都系揾个位掉走只(21423)先。
作者阿珊，从事财经及投资版报道超过10年，由平面媒体走到网络世界。相信技术分析，由窝轮到牛熊证无一不炒，唔贪心，志在揾餐下午茶。
