【盘房来料】调整中慨反弹可见32200
上周五系欧美股市慨黑色星期五，尤其美股三大指数均跌逾2%，主要系美债息急升，令到股市跟债市齐齐暴跌，拖累港股夜期当晚急跌至32000水平，今早新加玻黑期进一步下跌至31600点水平，导致港股大裂口低开。
恒指今早裂口低开886点，最低见31725点，碍于下跌裂口太大，收窄跌幅好正常，加上内地股市回稳，上证指数死守3400点，带动港股反弹收窄跌幅，中午恒指报收32022点，跌578点；国指则跌224点，报收13314点。
大部分指数重磅股都系大裂口低开之后，随大市低位回升，跌幅收窄，表面睇落好似好有支持，但阿Man暂时只视为调整中慨反弹，主要系大市由12月中28200左右起步回升，升至33500点水平，累计升幅5300点，当中一直未出现较大幅度调整。虽然目前由高位计算，至今朝低位约31700，已回调1800点，但仍遗下31100-31400点大型上升裂口未回补，要后市更上一层楼，呢个上升裂口先回补，大市之后可以升得更放心。估计今日大裂口低开之后，反弹有权去番20日线，即32200点左右，除非反弹之后再企稳32200点之上，否则仍有条件向下回补之前慨上升裂口，甚至更狠心踩落条50日线附近。不过今日裂口低开，31800以上慨恒指牛证已全部入晒殓房，暂时下一个重货区要落到31000点附近，断估呢两日先营造反弹，再睇牛熊证街货变化，再决定大户继续食牛扒，抑或又转口味锯熊掌。
要知大市几时调整完成，不过留意几只指数重磅股，腾讯(00700)、港交所(00388)跟平保(02318)都已失守20日线，尤其腾讯距离20日线453元较为远距离，当然腾讯一日上落十蚊楼上唔出奇，总之腾讯唔重返20日线企稳，再横行整固，暂时仍处于调整浪中。至于港交所跟平保，略为失守20日线，同样地唔收复20日线并靠稳，反弹过后唔排除再调整，买货唔需要太心急，再观察一两日再作决定亦未迟。宁买贵，莫买错，阿Man宁愿买贵，顺势坐住上，亦唔愿贪平嗰些少，买咗仲要被折磨，当然喺上月初已买入，喺30000边水平坐住慨平货，要留作货底，唔可以完全吉咗个仓。
幸而阿Man喺三万三水平已减持套利，并增加现金等捞货，暂时唔心急捞底，因为未能确定32000水平系短期低部，宁愿等大市回复强势，与其现水平买入，或可能再捱多一千点跌幅，倒不如待调整完成，同样喺32000水平买上，顺势买上点都容易打过逆境波。
港股通黑马
留意明日港交所会喺明日收市后更新“港股通”名单，大热门股之一慨阅文集团(00772)今日低开高走，现价已再逼近80元，好大机会获纳入港股通。而阿Man则睇埋另外两只黑马远大医药(00512)以及中海物业(02669)，两股同样市值系100亿元左右，呢个晒士最啱北水脾胃。但纯以今早走势嚟睇，远大医药最唔似样，系赔率廿倍以上冷门，反而阅文跟中海物业走势较为对辨，似有春江鸭为咗两股加入港股通而偷步入场。
麦狄文
(徐狄怡‧证监会持牌人)
