【轮证赢家】其实个个都系飞云
㖊日拣咗两只熊证出嚟，分别系安全之选恒指熊(63947)，同埋小炒级慨恒指熊(67492)，要数到入市靓位慨话，就要等到1点50分至55分，事关呢10分钟里面SlowSTC(14,3)出现超买，正正就系呢个时候入熊证慨好时机。
而呢个位一入慨话，就好似上咗过山车咁，一坐底扣好安全带之后，职员就禁掣开机，恒指就向下系咁冲、系咁冲，去到临收市前10分钟都做全日低位30688点。到最后埋单报30725点，跌378点。呢个点数系无早几日跌500、600点咁惊吓，但正就正在一上车就开车嗰吓先爽。
更重要慨系，㖊日飞云慨目标系打四层创界山(以6月11日恒指牛熊证街货图为准，即系第四最贴价慨牛证街货30600至30699点)，这边厢将刚打好一篇文upload到weibo，那边厢个市就开始下行，有读者喺weibo讲返佢哋变身成飞云之后，打创界山打到落第几层，真开心。
Anyway，今日再睇返牛熊证街货图，㖊日被飞云打散嗰三层最贴价慨牛证当然无咗啦，而30600至30699点呢度成为咗最贴价个层，而呢度有相当于1372张期指，重货区嚟架。依家9栗55分，隔离个同事分咗半分餐蛋治比我，我分咗半条蕉比佢之后，见恒指暂时最低做过30613点，即系话30600至30699点仲有13点先全部死亡。“差13点都唔杀埋啲30600啲牛牛？”战友Jack留言，然后我回佢一句：“唔会慨”因为30500至30599点，即第二层贴价牛证有785张期指，话就话美国加息0.25厘拖低美股跌近200点啫，但呢次加息唔系全地球都预咗架咩？
再睇恒指日线图，依家9点59分，恒指转跌为升，不过今日暂时计成粒烛都处于20天线(30849点)以下，换言之即系处于保历加下降通道，以低位30613点计，系穿过条50天线添(30635点)。横返条短短慨“下降通道”出嚟，依家恒指水平处于“下降通道”中间慨位置，咬住件餐蛋治时见到MACD出现熊差距，且DIV已经录得负数，若然再继续下行慨话，好快就“双熊”。
谂住入pantry斟杯水，见到designer Ken用支长棒洗杯，我呢啲cheap精就更系唔输蚀，攞咗支棒棒帮自己嗰只洗埋啦，斟埋杯水返到位就见到恒指由升转返跌，恒指熊(67784)，收回价31500点，同现价有约800点差距，安全、街货低兼成交活跃；咁...其实飞云都可以带头盔架啫，平平安安赢到收市，高高兴兴今晚等开波嘛！
作者阿珊，从事财经及投资版报道超过10年，由平面媒体走到网络世界，《钟摆战策赢港股》作者。相信技术分析，由窝轮到牛熊证无一不炒，唔贪心，志在揾餐下午茶。
电邮：[email protected]；Weibo：#Gladyshan
