【盘房来料】港股反弹乏力等终极一跌
隔晚美股各走各路，道指结束四日跌势，虽然早段曾跌近百点，但尾市收复失地倒升20点散场，但标指跟纳指续跌，尤其科技股沽压较大，纳指又跌近1%收市。至于港股今日表现反复，恒指低开78点报26895，早段喺A股带动下曾最多升221点，高见27196点。可惜亚太区内股市普遍下跌，连早段上升慨A股亦转跌收场，港股只有跟大队，齐齐队，由升转跌，盘中曾跌305点，低见26670点，再创超过一年新低。中午报收26744点，跌230点；国指则跌57点，报收10520点。若然今日港股收市低过26787点，即由今年1月高位计跌两成，即港股已步入技术性熊市。
不过无论死亡交叉或者技术性见熊都好，大市通常未必即时插水深潜，反而会先反弹再跌，但6月时阿Man已讲咗港股熊踪处处，确认入熊，熊市要跌见多先真正见底，不妨用过去廿年，之前三次股灾作参考。睇番98年亚洲金融风暴嗰一剂，由97年高位16820点插水六成，至98年慨6544点先见底；而科技股再加沙士连环击，由2000年高位18397点，跌至03年8331点，跌54%后熊市方结束，而2007年慨次按危机再加2008年金融海啸，则由2007年高位31958点，跌66%至2008年10月慨10676点先见底。若然今次浪顶系今年1月慨33484点，跌五成系16742点，当然呢个低位多数今年内唔会见到，皆因对上三次熊市，最长可经历三年，但以一年至年半为时限，即系明年中之前，指数有机会低见二万楼下。
至于今次呢一轮跌浪，几时有得反弹呢，本来阿Man预期反弹或于今日最早出现，事关恒指日线由28500点双顶回落，已跌至保力加通道底部26842点，而㖊日跌至呢个水平附近亦即市见反弹，可惜今早港股低开反弹至27200点之前又掉头，再度回落至26900点之下，急挫至26670点，虽然收市前重返26700水平，但未能重上26900点水平，暂时难确认短线见底。不过大市若能重返26900点企稳，并进一步回升至27200-27300水平，则呢一轮跌浪完成，将展开短线反弹。不过港股市底实在弱过药煲，若然今日未能重上26900点并守稳，将继续向26200点出发。
睇番牛熊证街货分布，大市落到26200点水平，刚好做瓜所有牛证街货，而熊证呢，最近一个重货区喺27900点，仲远过由中环去沙头角，暂时似未有诱因要挟上，睇样大户短期都系先㓥肥牛再储熊。缸边友问若然熊证街货一直喺无雷公咁远，个市仲有冇得弹，讲真一句，家阵利淡消息十面埋伏，而好消息只有侵侵肯放过美国慨贸易伙伴一个咁大把，仲要系呢个可能性极低，港股继续以一浪低于一浪形态向下推进，期间慨小型反弹，可能愈见乏力，目前都系等紧终极一跌，至于呢个日子系几时，阿Man无水晶球，自然未能未卜先知。
麦狄文
(徐狄怡‧证监会持牌人)
